Spéitstens elo ass et un der Zäit datt di jonk Muppen d’Waasser kenne léieren. Heibäi ass et och ganz egal ob een e Retriever ass oder eng Brack. All Mupp ka schwammen, heinsdo feelt et just e bëssi un der Motivatioun an un der Technik.
Als klengen Erdhond war ech och net sou begeeschtert vum Waasser am Ufank, dofir verroden ech iech elo wéi meng Cheffen mech ausgetrickst hunn fir an d’Waasser ze goen:
Duerch eng Baach trëpplen:
Zemools mat ganz jonken oder ganz klenge Muppen gëtt et hei eng immens einfach Technik: Et sicht een sech eng kleng Baach, deet Gummi Stiwwelen un (also de Chef, net de Mupp), an dann geet een einfach doduerch. Di meescht jonk Muppen wëllen onbedéngt bei hire Chef, a sou kann et sinn datt de Mippchen dann zimlech séier op emol op där aner Säit ass.
Hei kann een als éischt eng ganz flaach Plaz notzen, wou de Mupp nach duerch trëppele kann, an da méi spéit eng wou e vläit de Bauch och naass kritt oder souguer schwamme muss.
Oppassen datt hei just net di éischte Kéier well staark Stréimung ass, de jonke Mupp soll gutt Erfahrunge mam Waasser maachen.
Reizaangel:
Dat muss näischt immens professionelles sinn. Eng laang Rutt mat enger Schnouer geet well duer. Um Waasser klappt et am beschten wann e mat engem Flillek vun enger Dauw, Int oder Fasan schafft. Einfach de Flillek rofschneiden an un d’Schnouer strécken. Am beschten mam Messer als éischt e Lach an de Flillek maachen, dann hält de Buttek och besser.
Am Ufank kann een als éischt bëssi u Land domadder schaffen, an dann lues a lues méi no un d’Waasser goen. Wann de Beutetrieb bis su richteg wakrech ass, ass dann op emol och ganz séier den éischte Schratt an d’Waasser gemaach. Steet de jonke Mupp well dran, da kann ee lues a lues kucken ob een de Mupp och sou un d’Schwamme kritt: als éischt just kuerz de Buedem ënnert de Patte fort an da lues a lues méi wäit.
Mat an d’Waasser goen:
Wann et elo gutt waarm ass, da kann zur Nout och de Chef mol mat an d’Waasser. Spéitstens dann missten di meescht Muppen am Waasser sinn.
De Mupp schwëmmt: an elo?